-Har du lese?, spurde skulemeisteren ein dag i forbifarten på gata.  -Nei, kva då? - Brevet som Villand har sendt til ordførar og heradsstyre. -Det var meget bra, men eg trur det går hus forbi, avslutta han, før han for vidare.

Endeleg har det lukkast Norheimsund Info å knyta ein rimsmed til redaksjonen. Etter at han fekk referert samtalen med skulemeisteren, leverte han etterfylgjande til fri bruk. Skribenten ynskjer å vera anonym, men då innhaldet knapt kan kallast injurierande, vel me å publisera diktet in extenso.

(Til orientering er det omtala brevet å finna på www.kvam.no på innsyn for 26.08.09).

Brevet som gjekk hus forbi
1.
Me lever i ei tunge tid med strid og nattevåk
og folkevalde tillitsmenn som eglar helst til bråk
me trudde at me levde i eit trygt demokrati
men draumen brast
det er skildra kvasst
i brevet som gjekk hus forbi.
2.
Brevet som gjekk hus forbi er åtte sider langt
det spør i både aust og vest om ymist rett
mest vrangt
og har du ikkje lese det
det står til evig tid
for brevet er journalført
tjueseks nullått nullni.
3.
På heradet sitt internett du finn det fort som lyn
på ve ve ve dott kvam n o du finn det på innsyn
me ventar spent på svaret frå ordførar og parti
men fryktar visst
det går som sist
at brevet det går hus forbi.
4.
Formannskaplovene vart innførte i attentrettisju
dei føreskriv at kommunane
skal styrast av meg og du
hjå oss har det utarta seg til eit eliteri
der folk har site tjue år og meir
for sitt parti.
5.
Eliten styrer bygda vår med vilje hard som stål
når folkeviljen reiser seg då har dei ikkje tål
med hittfolket sitt ve og vel dei skaltar som dei vil
med bom og skule, kabel mast
med skatt på eigedomen fast
dei tyngjer oss i kvil.
6.
Men kvila det er ikkje lett når mistrua er kveikt
og holdet til dei styrande er både blasst og veikt
me uroar oss dag og natt kva dette endar i
og endå meir
når ingen svarar
brevet som gjekk hus forbi.

Styrk Frisk-Ulen